Dyondzo ya 1: Ku pulana na ku lunghiselela atikili ya wena

Eka dyondzo leyi, u ta dyondza ndlela yo pulana na ku lunghiselela ku tsala atikili ya wena. Leswi swi katsa ku hlawula nhlokomhaka, ku twisisa leswaku i rungula rihi leri se ri tsariweke hi nhlokomhaka ya wena leyi u yi hlawuleke na ndhawu laha u nga kumaka laha rungula ri kumekaka kona ku ku pfuna ku tsala atikili ya wena n’wini. 

Eku heteleleni ka dyondzo leyi u ta twisisa ndlela yo:

• Pulana na ku lavisisa atikili ya wena 
• Ku kuma laha rungula ri kumekaka kona ra atikili ya wena 
• Andlala atikili ya wena leswaku swi olova na ku tsakisa ku yi hlaya

Pulana na ku endla ndzavisiso hi atikili ya wena

1. Hlawula nhlokomhaka 

Hi yihi nhlokomhaka leyi u nga ta endla ndzavisiso na ku tsala hi yona? Ku hlamula xivutiso lexi u fanele ku ti vutisa leswaku:

• Xana i nhlokomhaka leyi faneleke eka webusayiti leyi yi nga ta hangalasiwa eka yona? Xikombiso. atikili  ya ku cheleta swimilana yi lulamerile webusayiti ya ku rima swirhapa kambe atikili ya swithuthuthu a yi lulamelanga.
• Xana yi wela eka xiyenge leyi nga kona eka webusayiti yeleyo?
• Xana se ku na atikili eka webusayiti leyi vulavulaka hi nhlokomhaka leyi, kumbe leyi yelanaka na yona?

2. Tindhawu laha rungula ri kumekaka kona

Loko se u hlawurile nhlokomhaka leyi u nga ta tsala hi yona, u ta fanela ku kuma tindhawu laha marungula ya kumekaka kona ku yi tsala. Ti vutise leswaku, xana ndzi lava marungula ya njhani naswona ndzi nga ya kuma kwini? Muxaka na tindhawu laha marungula ya kumekaka kona leswi u swi lavaka swi ta ya hi nhlokomhaka leyi u yi hlawuleke. Loko u tsala hi mayelana na ku rima swirhapa u nga kuma marungula hi ku: 

• Endzela layiburari ya le kusuhi ku kuma tibuku leti vulavulaka hi ku rima swirhapa
• Ku vulavula na vahlayisi va swirhapa na van’wamapurasi va le kusuhi endhawini ya ka n’wina
• Ku lavana na marungula eka inthanete. Ku ta va na tiwebusayiti to tala hi mayelana na ku rima swirhapa na ku byala swilo.

Loko u tsala hi mayelana na miganga ya le kusuhi, matimu ya yona na ndhavuko, u nga kuma marungula hi ku:

• Ku vulavula na ku burisana na vanhu lavakulu emugangeni wa wena lava nga vaka na marungula hi matimu ya rixaka na switori swa vakokwana, mindhavuko na vutivi bya ndhavuko.
• Ku vulavula na ku burisana na vanhu ku fana na tin’anga ta xintu na vatlhokovetseri.
• Ku lavana na marungula eka inthanete. Xikombiso. Mintlawa yin’wana ya Facebook yi na marungula yo tala hi mayelana na tinhlokomhaka to hambana-hambana ku katsa matimu ya rixaka.

3. Ku yiva ntirho wa munhu wun’wana na ku kopa

Loko u tsala atikili ya wena, i swa nkoka ku tsala nchumu lowu nga hlawuleka no tlhela wu va wa ntiyiso. U nga kopeli tindhawu leti u ti tirhisaka ku kuma marungula. Papalata ku yiva ntirho wa munhu un’wanana ku kopa matsalwa hi ku landzelela magoza lama:

1. Hlaya tsalwa leri ri ku tsakisaka  (tanihi phephahungu, buku kumbe atikili)
2. Vekela tsalwa etlhelo kutani u tsala xitori hi ndlela leyi u xi twisisaka hi yona – hi ndlela leyi fanaka leyi a wu ta byela vanghana va wena hi switori leswi u swi hlayeke eka maphephahungu/tibuku
   

Leswi nga ta huma swi ta va hi marito ya wena, ku hleleka ka wena na rito ra wena.  U ta va na swivutiso eka swiphemu swin’wana, u engetela marungulo kumbe ku tshikilela laha swi nga faneleka ku endla tano. Leswi swi ta humesa tiatikili ta ntiyiso no koka rinoko.

Ku yiva ntirho wa munhu un’wana na matsalelo ya atikili ya xiyimo xa le hansi – tsalwa ro tshwuka ri kopiwile ku suka eka atikili yin’wana

Ntirho wa 1.1

Ndlela leyinene yo hlanganisa miehleketo eka ku tsala atikili yintshwa i ku endla xifaniso xo hlanganisa miehleketo eka xiphephana. Xifaniso xo hlanganisa miehleketo i xifaniso lexi tirhisiwaka ku  hlela rungula leri vonakaka. Hi lexi xikombiso xo hlanganisa miehleketo.

Sweswi teka timinete ta ntlhanu u ri karhi u endla xifaniso xa wena xo hlanganisa miehleketo ya tiatikili leti nga vaka kona.

Hlela na ku andlala atikili ya wena

1. Lunghiselela ku tsala

I swa nkoka ku kunguhata atikili ya wena na ku anakanya hi xivumbeko xa yona u nga si yi tsala. U fanele u endla nhlokomhaka, ku hlawula ndlela leyi u nga ta sungula nhlokomhaka ha yona, i rungula rihi leri u nga ta ri katsa eka xiyenge-nkulu (‘vundzeni’) bya atikili naswona xo hetelela ndlela leyi u nga ta yi heta hi yona.

 2. Hlela tsalwa ra wena

Xaxameta swiphemu swa nkoka leswi u lavaka ku swi katsa kutani u ndlandlamuxa leswi hi tindzimana. Ndzimana i ntlawa wa swivulwa hi mayelana na nhlokomhaka. Leswi swi ta endla leswaku tsalwa ra wena ri twisiseka no olova ku ri hlaya, na ku andlala atikili ya wena.

3. Andlala atikili ya wena

Katsa  “Sub-heading” (tinhlokomhaka-letitsongo) na “Heading” (nhlokomhaka ya H2 eka WordPress) ku olovisela muhlayi. Tinhlokomhaka na tinhlokomhaka-letitsongo  ti avanyisa tsalwa naswona ti nyika ndhawu exikarhi ka tindzimana na mianakanyo ya wena.

4. Endla leswaku swi va kahle

Tirhisa swivulwa swo koma na ririmi ro olova. Vana erivaleni, handle ka loko u tsala atikili leyi nga na vuxokoxoko byo tala kumbe yo leha, papalata ku va na marito yo hundza 400  eka atikili ya wena. Yi nga lehi ngopfu naswona yi nga komi ngopfu!

5. Ehleketa hi ku katsa xifaniso lexi faneleke kumbe fayili ya mpfumawulo

Ku engetela fayili ya xifaniso kumbe ya mpfumawulo swi endla leswaku atikili ya wena yi tsakisa swinene na ku koka rinoko eka muhlayi! 

Anakanya

Sweswi ehleketa hi nhlokomhaka ya atikili leyi u nga ta lava ku tsala hi yona. Kunguhata xivumbeko xa atikili, kombisa hi ndlela ya mavekelo na xivumbeko xi nga ta languteka hi yona.

Ntirho wa  1.2

Kunguhata atikili ya wena hi ku hlawula tinhlokomhaka-nkulu leti u lavaka ku vulavula hi tona. Leswi ku nga va tinhlokomhaka kumbe tinhlokomhaka-ntsongo. Nakambe katsa maendlelo man’wana na man’wana  lama u kunguhataka ku ya katsa eka atikili ya wena ku fana na tidayagiramu, swifaniso, tifayili ta mpfumawulo kumbe swiphemu swa tivhidiyo.

Nkatsakanyo

Eka dyondzo leyi u dyondzile:

• Ndlela yo kunguhata atikili ya wena, ku katsa ni ku hlawula nhlokomhaka, ku endla ndzavisiso hi atikili ya wena na timhaka leti kumbaka ku yiva ntirho wa munhu wun’wana na mfanelo ya le nawini yo kopa.
• Ndlela yo vumba atikili ya wena, ku katsa ku yi hlela na ku yi andlala.

Developed with the support of the: